[ الطباهج ] من مطبخ نوارة ليبيا

[نوارة ليبيا]

السلام عليكم ورحمة الله وبركاته

أهلين وسهلين ....،،

حبيت نقدم لكم طريقتي في الطباهج




(( طباهج ))





المقادير :


* باذنجانة واحدة

* كوسة ( قرعة بيضاء ) واحدة

* 2 بطاطا متوسطة الحجم

* بيضتين

* ( ملح + فلفل + بزار ( كركم ) + فلفل أسود + بهارات + جوزة الطيب ) <<<< على حسب

* معجون طماطم

*زيت زيتون && زيت عادي ذرة للقلي

* ماء



الطريقة :


* نقطع الباذنجان والبطاطا والقرعة ( الكوسة ) ...دوائر

ومن ثم نقلي كل منهم على حدة ....في زيت ذرة غزير .....( معلومة زيت الزيتون لا يصلح للقلي )

ويتم وضعهم على ورقة لمص الزيت

* بعد الأنتهاء من القلي نأخذ مقلاة ونضع بها قليل من زيت الزيتون + الملح + الفلفل الأحمر +
الكركم + معجون الطماطم .....وقليل من الماء
صلصة طماطم ....أو مرق

* نضع بها الباذنجان والكوسة والبطاطا

ونحركهم قليلا ..من ثم نضع عليهم البيض ونحرك الى أن يستوي البيض

ونضع عليهم جوزة الطيب والبهارات

وهذا شكلهااا النهائ



صحني



وهذا زوووم



وأتمنى يكون عجبكم
سلامات

[ام بشور]

اكيد راح يعجبنا

يسلموا هالايديات

اني نعمل فيه بس يقعد ناشف هلبه انحبوه هكي والدحي نصبه من فوق ونحطه بالكوشه يجي ايهبل

سلم هالايديات شكله ايسهف وباين فيه حار وحانط

والطماطمه شكلها روعه اللى مزينه بيها الصحن
منوره

[ليبيا]

السلام عليكم ورحمة الله ..

تعرفي لما نسمع كلمة طباهج نضحك .. لان كان عندنا معاه ذكرى رابطينها بيه
لعند توا لما انديروه انقولوا تعرفوا زمااان هههههههههه

الموقف وهو ان نحنا ماكناش نعرفوا شنو هو الطباهج تحديدا؟!
فمثلا يقعدن البنات يقولوا غدنا طباهج عشانا طباهج ؟!!
طبعا علامة الاستفهام كل مرة تكبر وتكبر ههههههههه
يوم من الايام داراته امي عشاءنا مش عارفة شنو جيب السيرة او امي قالته فجاة قدامنا علقنا فيها شنو هو الطباهج؟!
قتلنا واللي تاكلوا فيه شنو هههههههههههههه
قولنالها ان شاء الله هذا الطباهج مانحكيلكش شنو صار فينا ..
لان مش عارفة ليش توقعنا ان الطباهج اكلة رسمية وكبيرة هللبة فديما الاسم مرتبط بموقف ضحكنا فيه على روحنا ..كنا صغار وقتها وماعندنا ع المطبخ هللبة ..

يسلموا ايدياتك .. واجعنك ديما نوارة

[ليبيا قلبى]

امممممممممم
ايهبل
اعيون زوجى
فى رمضان لازم يوميآ انديرله طباهج

تسلم ايدك

[ام الجميلات]

يسلمووووا لكن اول مرة نسمع يديروا فيه دحي منك

[ام سريوات]

يسلمو يانورة

[الساجدة لله]

ماشاء الله لاقوة الابالله

يسلمو ايديك حبيبة وربي يحفظك وكل واحد وطريقته انا اول مرة نعرف ان الطباهج يضيفوله في البيض المهم صحتين على قلبك

[فضااوي]

رووووعه

تسلم الايااادي يالغلا

[نوارة ليبيا]

الله يسلمكم حبيباتي على المرووور الحلوو

الطباهج هو اي حاجه اطهبجيها على السريع وهو انك تقلي خضرا
بطاطا وكوسةوباذنجان وطماطم واي اي خضرة تحبي

هذا الطباااهج

بس اني انديرله في طبيخه ودحي

وفيه مرات انديرله في صوص مايونيز ولا كريم ساور << حامض

ومرات باشميل

على حسب جوي والمتوفر عندي

ومرات هريسة ونحطه في نفص وناكل ^_^

[kittygago]

ما شاء الله لا قوة الا بالله يا حبوبة


طباهج روعة روعة

و حتى اني اول مرة نعرف انه يضيفوله البيض

لكن المهم الطباهج مهما يضيفوله .... بنته روعة و صنة و بنة

يسلموا حبوبة