[ فطيرة مع فطور مفتلك ] من مطبخ للاهم

[للاهم]

خير يا بنات

امس عطلة ومن الليل عجنت ناوية فطيرة او فتات او رغايف – اساميه واجدات
انا اول مرة نديره
ديما نفطروا بيه عند اصحابنا
تصبح صاحبتي ل ي المغربية من الصبح بدري تعجن الرغايف
وتخليهن يتريحن
وبعدين تقرصهن
وعلي ما نضن تكون بدت اطيب فيهن عالطاوة
يجي قولن شي عشرين طرف او اكثر
زوجي يحبهن
قلت يللا يا بنت اشطري وحاولي اديريهن
طبعا عجنتهن من الليل
ف الصبح ما نلقالهشن عزم

يجي كوب دقيق قمح وشوية دقيق ابيض
وشوية ملح وشوية امية
وكنت نعجن ونزيد المية الدافية بالشوية
نين تلايمت معايا العجينة
وبقت رطبة وما اتلصقّش
حطيتها عالرخامة وعجنتها ولتيتها كويس
غطيتها في صحن غريق
وخشيت رقدت
ف الصبح زدت عجنتها
وقرصتها
مغير 5 قريصات حاشا عيونكن
راس ورويس
وملستهن بزيت الذرة

وعشان تجربة ما بيتش نكثر
وبعد تريحن القريصات
بديت بالوحدة نفرد فيها بالزيت في سفرة
ونطبق

وخليتهن يتريحن
كانكن بديتن تفردنهن طول يتمزقن
لازم يرتاحن بيش يسهل فردهن من جديد

المهم كملت فردهن وبديت نطيب فيهن بالوحدة علي طاوة
ودهشني
بصراحة قلت لزوجي صاحبتي ل ي يعطيها الصحة لازم نعطوها وسام اللي مسكينة تصبح من الفجر تعجن وتقرص وتفرد
وتقدمهن لنا
ساخنات مع فطور معنقر
المهم مكثر دوتي!

وتيت الفطورالبسيط

شوية زويتينات من عمل يدي
ودحي مطبوخ
ولبنة عليها زيت ونعناع يابس
وشاهي اخضر منعنع

وطلعن سمحات وطايبات كويس
الحمدلله سترني
وكانت فطرة بسيطة ولذيذة
والجو بادي حلو برة
شميسة والحمدلله
----------
ملاحظات : تعلمت من صاحبتي نحط كمون مع الدحي بيش ما يديرش نفخة البطن

معلومة استفيدن منها
ومن الصور تلاحظن اني طيبت الفطيرة واجد
نحنا نحبوها طايبة وفيها شوية حرقة
مش تقولن حرقتها
باهي!

[نوارة ليبيا]

باهي مش محروقات ههه

ماشاء الله ياللاهم رووووعه تبارك الرحمن يالغالية
وياريت تحطي أسمك عليهم

مااااشاء الله بجد والصور تبارك الرحمن
ربي يعطيك صحيحتك

واسلوووبك ايهبل وأحلى تقيم يالغالية

[نعم درناويه]

حى عليك ياللاهم ماليش دعوه نبى الى فى الصحن كله الدح والويتونات وهابا عالفطيره الى شكلها ايطحطح

سلم ايدين الحره ياربى

[kittygago]

و الله توا شن بنقول

غير يعطيك الصحة

و آآآآآآآآآآآآآآآآآآآآآآآآآآآآآآخ يا قلبي على اللي نشوف فيه

يعطيك الصحة انتي و صاحبتك

يا هكي الفطيرة يا بلاش

ربنا يبارك فيك

و لا ننحرمو من ابداعاتك

[الساجدة لله]

ياعيني ياعيني على اللهجة اللي تهبل انتي مسجل خطر ههههههههههههههههههههههه الله يحفطك واحلى تقييم على لسانك اللي ينقط عسل بلاهي خليك زي ماانتي بلهجتك وعفويتك واسلوبك البرئ

[للاهم]

هههه كيتي تسهيفك سهفني قلت شكلها فطيرتي سمحة وانا ما نعرفش
سلمك جياية

[للاهم]

شكرا خيتي ساجدة والله انا قاصدة نكتب عامي
اكلنا الليبي صعب نعرض بغير هالاسلوب
مع شوية حناطات بيش نمرق موضوعاتي
سلمك جياية تعالي ديما

[للاهم]

درناوية مغير امتى علقتي؟
شكلي فلمت
ماشفتك اللا توا!
هابا ما فضل منه شي ! سلامتك
توا نديرلك مخصوص وندزلك في درنة
وسلمي علي درنة وعرب درنة وخوال امي فيها

[خدوج]

فطيرة قنينة
تسلمى يالاهم

[للاهم]

يسلمك خيتي خدوج