ساعدونى بكتب طبخ ليبية

[كيميائيه]

السلام عليكم فى البدايه هذة اول مرة اشارك فى هذا الركن لكن فيه حاجه من زمان فى بالى وهى ان مافيش عندنا مكتبة مطبخيه ليبيه يعنى الكتب اللى فى المكتبات اما عربيه او اجنبيه مترجمه اللهم الا بعض الكتب البسيطه واغلبها تجاريه او تكون كتب متواضعه لاتفى المطبخ الليبى حقه من التقدير يعنى مش واضحه ومش مفصله يعنى انا خاطرى يكون فيه كتب تهتم بالاكل الليبى من الالف الى الياء ويشمل الطبخ القديم والمعاصر خصوصا ان ليبيا مساحتها كبيرة وفيها تنوع وانا هاويه فى المطبخ وحابة نعرف كل شئ عن الطبخ الليبى وبصراحه هذا المنتدى وبعض المنتديات الاخرى ساعدنى لكن مش دائما النت متوفر ومافيش احسن من الكتاب لذلك ياريت البدايه تكون من هنا بسد هذا النقص فى المكتبه الليبيه من كتب الطبخ ليش مانستفيد كلنا من التجارب والمشاركات فى الصفحه وتصدر كتاب او حتى مجله شهريه تنشر فى المكتبات تصدر كل فترة لتعم الاستفادة على الجميع وخصوصا ان الوصفات هنا ماشاء الله مواكبه للعصر ووبها تجديد معلش طولت عليكم لكن من حبى لهذة الصفحه تمنيت ان يكون فيه منها كتب او مجلات وانا اول من يشريها وارجو من كل الاخوات المشاركه فى هذا الموضوع واللى يعجبها تدير لايك قصدى تشارك ولو بكلمه بالك يصل صوتى لادارة المنتدى اختكم كيمووووووووووووووو

[الصابرة]

فعلا هو موضوع يستحق التوقف عنده
لكن حبيبة تقدير اديري ابروحك كتاب إلكتروني من الوصفات التي تعجبك وتحفظينها بها في جهازك وكل ما احتجتي وصفة والنت مفصول تجديها
وفي موضوع كيف تعملي كتاب إلكتروني
اما بالنسبة للأصوات يكون عندهن كتاب فهذه قصته كبيرة تخيلي إلا ليا سنة أحاول عمل كتاب طبخ لكن لم أوفق إلى الآن لكن لن افقد الأمل في خروج كتاب لي

[كيميائيه]

شكرا اختى الصابرة على الرد
باهى اذا كان عندى كتاب هل نقدر نصورة ونرفعه على الموقع او فيها تعدى على حقوق النشر للكاتب
لان عندى كتب ونبى نفيد بها الاخوات لكن خايفه يكون فيها ظلم للمؤلفه

[luba]

فكرة جدا حلوة ورائعة بارك الله فيك
بس هذه الفكرة تبيلها حد يوقفلها يعني يختار ويطبع ويعدي لدار نشر وفيها حقوق نشر وطبع
وتوزيع يعني عمل يبي جهد وناس تتفرغله وتاخده من محمل الجدية
والمجلة تبي ناس حاطه بالها في هذا المنتدي فقط وطموحها بالرقي به بكل الوسائل والابتعاد عن الانانية
ولكن ما باليد حيله
وفكرت مند مدة ان نفتتح ركن يترجم وصفاتنا الي الانجليزية
لكن كل الافكار تحتاج للعون والكتير من العمل والتعاون
وليس بمقدور اليد الواحدة التي لديها مسئوليات اخري غير المنتدي ان تعمل لوحدها والعمل الناجح
يحتاج الي اسس قوية منها الضمير الواعي والفريق القوي التابت الذي لديه العزيمة والاصرارللنجاح
والصبر وضغط بعض المسئوليات لديك لتتزن الكفتين
ولو كنت في ليبيا لكنت اول من يعمل بفكرتك هذه لانها فكرة راااائعة جدا ومهمه لرقي المنتدي وتوزيعه حتي
علي شريحة المجتمع البعيدة عن النت و التي ليس لديها اهتمام بالكمبيوتر او الوقت
ولو اقتصر العمل عندي حتي علي نطاق مدينتي فقط مع حفظ الحقوق للمنتدي والعضوات

نأمل ان تجد فكرتك صداها هنا قبل اي منتدي ليبي اخر
لانه بعض المنتديات العربية اصبحت تنزل الكتب وتباع بمبالغ ليست بالهينة
شكرا جزيلا كيميائية
ادا وافقت الادارة نتمني ان تجد التعاون حتي من العضوات في كل مدن ليبيا و كدلك يحتاج الي
التعاون المادي والعملي والمعنوي

[الصابرة]

اختي كيميائية
عادي تقدري اتصوري كتاب وتنزليه ومافيهاش تعدي على حقوق المؤلفة بل على العكس ممكن تزيدي من شهرتها
لماذا لايعتبر تعدي لانك تريدي ذكر اسمها
واني كانت الفكرة في بالي عندي بعض من كتب الاخت سالمة الكرغلي واللي كانت السبب في وضع اساسياتي في المطبخ
لكن غير الظروف لم تسعفني لعمل ذلك

وهذه روابط تساعدك على كيفية عمل كتاب الكتروني وكيفية تحميله


طريقة تحميل الكتب الإلكترونية


ابسط طريقة لعمل كتاب الكتروني بصيغة pdf بواسطة اوفيس ميكرو سوفت 2007


[ اعلان ] مسابقة كتاب الطبخ المميز

[كيميائيه]

امتى اخر موعد للاشتراك بالتاريخ لانى ماعرفت المسابقه قديمه او جديدة وهل مازالت مستمرة او لا

[أمـ ساره]

وعليك السلام والرحمة كيميائية

كلامك مزبوط حبيبة وعين العقل وكلنا نتمنوه

قبل الاحداث كنا نشتغلوا على مجلة للمنتدى خاصة بوصفات العضوات
بس للأسف ما اكتملت صارت الاحداث وبعدها انشغلنا بالثورة وفرحنا وقعدنا نستنوا شنو بيصير
بس للأسف بعض من كانوا يشتغلوا معاي فيها غابوا على المنتدى وطبعا كل وحدة وظروفها وربي يرجعهم لينا من جديد
وما قدرت نكملها لوحدي للأسف لأنها تحتاج شغل ووقت وهذا عير متوفر عندي فالغيناها
والمفروض انها كانت تكون شهرية لكن قدر الله وما شاء فعل


وأيضاً طلبنا من العضوات ان كل عضوة تحط وصفاتها في كتاب الكتروني وتنسقه بفسها حتى ما يضيع شغلها
خاصة ان فيه فترة كان المنتدى مستهدف من بعض الهكر وصارت فيه اعطال
لهذا زينب طلبت من كل وحدة ادير كتاب خاص بيها ويتم تجميعهم في موضوع أو في الصفحة الرئيسية للمنتدى
وأيضاً للأسف ما تم هالمشروع وبعض الاخوات بارك الله فيهن كملوه ونزلوه لكن كان العدد قليل


وبالسبة للكتب
المشكلة في المطابع ما يقدروا يطبعوا أقل من الف نسخة وهذا مكلف جداً لأي شخص
ولو بتتكفل بيه جهة معينة معناها نسبته في الارباح بتكون قليلة وبيكون فيه استغلال واضح

وأكيد نتمنى انه يكون فيه هلبة كتب ليبية تطبع وتباع في الخارج
وهذا مشروع يبي دعم كبير وناس توقف له حتى ينجح

وطبعاً انتي لو تعرفي وتقدري اديري وتنزلي كل وصفة باسم صاحبتها ما يعتبر تعدي على الحقوق

وكل من لها معرفة بهذه الامور وعدها الوقت والخبرة ياريت تفيد غيرها وتنفذ بعض الكتب ليسها تحميلها وتوفيرها

كنت نتمنى اني نقدر نكمل ولو مجلة وحدة لكن مسؤولياتي كبرت وما عندي الوقت ولا الجهد عليها
وان شاء الله نشوفوا مشروع قريب لكتاب طبخ ليبي ولو كان منوع مش من طباخة وحدة
وحتى لو كان صغير وما فيه هلبة وصفات بعدها حيتشجعوا اخوات بالفكرة وممكن ينفذوها

[أمـ ساره]

وبالنسبة للمسابقة فهو موضوع قديم
لكن ما تتقيدي بيها لو عندك كتاب تقدري تصوريه وتنزليه للفائدة

[كيميائيه]

بارك الله فيك اختى ام سارة وساحاول اصور بعض مما عندى حتى فصول او صفحات من هذة الكتب