السلام عليكم ورحمة الله وبركاته
اليوم قدمته مع السحور وكان مميز وخصوصا اني مانبيش نكتر اكل المحظورات في الشهر الكريم
كان على بالي وخاطري فيه بس قصة الموس كربوني الللي مش متوفرة في البلاد والبديل عليه
اكيد خلطة الاجبان الحق مش جاي على بالي نكهة الاجبان !!!
شن الحل ياسجودة شن الحل اهااا لقيتها كاسترد هو البديل ونبي ناكله بنكهة تانية
وكان عندي نكهة الفراولة وطواااالي لغرفة العمليات قصدي للمطبخ ولتطبيق
وتوا كيف قدمته وكليته والحق عجبني صورته وجبتهولكم .
المقادير
بسكوت الليدي فنجر
نسكافيه + ماء مغلي
عسل او سكر الفواكه انا استعملت 1 م ك من الاتنين
حليب خالي الدسم
قطرة من روح الفراولة او اي منكه غدائي اخــر
كاكاو بودرة سادة
2 م ك كاسترد بودرة
الطريقة :
يحضر الكاسترد زي مامكتوب على العلبة متع الفوستر كلاركس
بعدين نغمس البسكوتات في النسكافي المخلط بالمية المغلية.
ونستفه اي نصفه في قوالب الالومنيوم المغلفين بورق الزبدة
وبعدها نسكب طبقة من الكاستر تم طبقة بسكوت مغموس في
النسكافيه , وهكدا لعند مانعبي القالب .
بعدين نرش الكاكاو .
ونبرده في التلاجة وبعدين نقدمه بعد مايبرد والطعمة مش عادية
ومريح جدا خصوصا انه متكون من النشأ يعني ناكله وانا مطمنة.
جربوهــــا وادعولي , سمـــحة بالمرة
وصحة وهنـــــا
المفضلات