[ مشاركة في المسابقة المفتوحة للمقبلات الرمضانية ] الفليفلة من مطبخ أم أيوب

**أم أيوب** · 07-27-2012, 05:26 AM

السلام عليكم ورحمة الله وبركاته

الفليفلة أو زي ما نسموها الفلفل الروسي من أنواع المقبلات اللي نعشقهن ومانمل من أكلهن

وما تخلوش عزومة ليا من وجود هالنوع من المقبلات

ممكن تجهزيه بمفروم اللحم وممكن باستخدام الدجاج بس عندي الدجاج أبن وأحلى فيها

المقادير :

صدور دجاج مسلوقة ومفرومة في ست البيت + كسبر أخضر مفروم + 3 فصوص ثوم

رشة فلفل أكحل + رشة ملح + رشة حرارات + فلفل حلو مقطع دوائر نص سميكة + بيض + خبز مرحي + زيت للقلي

الطريقة :

نخلط مفروم الدجاج مع التوابل والملح والكسبر والثوم المهروس ونضيف عليهم بيض لعند ما يقعد الخليط لين نوعا ما

ديري بالك لو كان الخليط رطب زيادة مش حتثبت الحشوة في الفلفل وضيفي شوية خبزة مرحية بس لو كان تمام ما تضيفي خبزة

نقطع الفلفل الحلو حلقات مش سميكة ومش رقيقة زي مافي الصورة

ناخد شوي من خلطة الدجاج ونحطها في وسط الحلقة متاع الفلفل ونضغطها بين كفوف يديه ونملاها لو كان فيها فراغات

نبطنها من الجهتين في بيض وخبزة مرحية ونقليها في زيت ساخن

يادوب نحمر الوجهين وهذي النتيجة

هالنوع من المقبلات سريع ويستر وقت تجيك عزومة مفاجئة

في أمان الله

**luba** · 07-27-2012, 06:26 AM

ماشاء الله عليك اللهم صلي علي النبي
ربي يحفظك انت وصغارك وتاج راسك
من ايام فاتو كانت وحدة تسأل عليه بارك الله فيك لي اضافتها في مطبخنا الرائع
طالعين تحفة من ايديك الحلوات
جاري التقييم ليك وللموضوع