كل سنة وانتن طيبات - سرعة الدخول قبل الحلول - توثيق قراراتكن للعام الجديد

[للاهم]

كل سنة وانتن طيبات خياتي بنات المطبخ الليبي
كل سنة وانتِ طيبة زينب محمد اللي لميتينا هنا انشاءالله نلتموا عندك قريب
اسمعن كل وحدة تخش وتكتب شن مقررة ادير العام الجديد وشنو امنياتها
وعليها تلتزم بخياراتها لأن اخر العام الجاي الحي واللي يعيش بنخشو ونقيموا التزمتن واللا لا
شن رايكن!
خلي انزل هذا قبل يطير مني
وانظني اول امنية ان يزيدوا وقت الكتابة هنا - ديما مواضيعي طايرة مني عشان نطبع هنا علي طوووووول

[للاهم]

من اهم قراراتي اني نكون منظمة اكثر
اني ندور علي عمل - مليت من البطالة
اني نحدد ساعات النت مع اعطاء النصيب الاكبر للمطبخ الليبي
اني نرد لهواية القراءة اللي هملتها بسبب النت
اني نحاول نسيطر على الحنين القاتل لأهلي ووطني ونرضي بقسمتي
لعند نروحو باذن الله
اني نهتم بصحتي ونراقب اكلي ونلغي من خزيني المعلبات وغيرها
اني نهتم بجنان المطبخ
ما ناكل خضرة الا من زراعتي
اني نطور من خبرتي في الحلويات على الطريقة الصحية
اني نلتزم بفيتاميناتي وادويتي بدال سطر اه وسطر لا
اني ننظم مصروفاتي ونقتصد ونخلي قرش ابيض ليوم لا اعلمه
اني نوسع دائرة علاقاتي بيش ما نحسش بالوحدة
اني نتطوع في شيء نحبه للافادة والاستفادة
اني نتعلم هواية جديدة
اني نراعي زوجي
اني نحب الناس اكثر
اني نقترب الى الله اكثر
وربي يعطيني ويعطيكن طول العمر ونشوفوا شنو نفذنا منهن وفي ايش قصرنا
والامنيات نخليها على الله عزوجل وهو العالم بحالي
ونعم بالله

[السمحة]

(السلام عليكم
كل عام وانتى بخير اتمناء من الله فى العام الجديد ان يرزقنى الله بالذرية الصالحة وان نبقى بصحة وسلامة

[التا ئبه لله]

السلام عليكم
تسلمى حبيبه لطرحك للموضوع والله
امنيتى كان ربى طول فى عمرى ما نبى من هاالدنيا شى غير رضه ربى تم رضه ربى تم رضه ربى

ونسال الله حسن الخاتمه اللهم امين وكل عام ونحنو الى الله اقرب يارب
وينولنا الا فى خاطرنا يارب يا كريم
ويحفطنا من كل شر ويرزقنا من حيت لاندرى ولا نحتسب ويوفقنا الى ما يحب ويرضه

[ام رواسي]

والله يا وخيتى كل واحد يقرر أو يتمنا يدير حاجة لكن بنسبة ليا شو يضمنى انى انعيش لغدوة
ولكن كل ما اتمنا ة حسن الخاتمة ورضا الله اتم أمى وربى يحفظهالى ويحفظلى زوجى واولادى وبنتى وعائلتى ويسمعنا على بعضنا الاخبار الطيبة يا رب
وكل سنة وانتم طيبين صحيحين بخير
واجعلها سنة مباركة على الجميع

[بنية بوها]

عن نفسي يااختي مافيش حد ضامن الحياة الي بكرة وكل انسان يتمنى يعيش حياة احسن من اللي عايشها
ويتمنى يغير ويطور من نفسه وحلو موضوعك بجد باش كل انسان يفكر ويراجع نفسه بس اني مع المتل اللي يقولك
عش يومك وكانك تموت غدا وشكرا علي طرحك للموضوع ويارب يوفقك ومن احسن الي احسن

[طمطم]

حلو موضوعك ياللاهم

بس نبي نلفت لشي يا بنات..... كلنا نتمنى حسن الخاتمة والرضا والصحة

بس في طرق نوصل بيها للأمنيات.... وهذا على حسب ظني اللي تقصده للاهم بالموضوع

يعني.... شن ممكن اديري باش تقوي عزيمتك وتساعدي باش تحصلي أمنيتك

يعني مثلا اللي تبي رضا الله وحسن الخاتمة... تقول بندير ورد كذا اللي بطلت عليه.... بنصلي كل يوم مثلا في وقت كذا كم ركعة..... بنقوم الليل كذا من الوقت.... بنتوقف على معصية كذا.... أو طبع كذا

يعني مش تقولي أمنيات .... تقولي أسلوب في الحياة بتحاولي اديريه باش تساعدي نفسك تحصلي أمنيتك

طبعا أني هذا اللي فهمته من للاهم وإن شاء الله مانكونش غلطت
عذراً للاهم ...بس حبيت نوضح فكرتك للبنات...

والمثل اللي قالاته بنية بوها يحث الناس على تحديد أهدافها وتجديد النية والعمل دائماً لنكون أفضلا وهو يقول:
إعمل لدنياك كأنك تعيش أبدا واعمل لآخرتك كأنك تموت غداً


هنضيف أمنياتي بعد ما انظمها إن شاء الله

[نعم درناويه]

السلام عليكم موضوعك حلو ياللاهم
اولا امنيتى فى الحياه انى انواضب على صلاتى وعلى قولتك نمسك سطر ونسيب سطر
ثانيا انظم حياتى وحياة بناتى هما الناس الى ايشوفوا فيه ايقولوا ان حياتى منظمه بس العكس صحيح
ثالثا ان شالله ربى ايساعدنى ونحول فى حوشى الجديد مليييييييييت من الضيق
وشكرا وكل عام وانتن طيبات وقريبات وبسلامة اصحاب دياركن وصغارن وهلكن

[للاهم]

شكرا طمطم على التوضيح انا حسيت ان الفكرة ما وصلت للبنات
الفرصة ما زالت موجودة بالاضافة والتعديل
حتى انا قراراتي مازلن مفتوحات ممكن يتوضحن لي قرارات جدية الليلة ونضيفهن
والمطلوب ان بعد يكملن البنات كلهن كان شاركن يغلق الموضوع عن المشاركة ويبقى مُعلق لغاية نهاية العام الجاي بأذن واحد احد
بعدين نفتحوه ونخشوا كلنا نناقشوا شن تنفذ وشنو ما تنفذش ونكتبوا قرارات العام اللي بعده
هذي حاجة كنت ندير فيها من زمان نكتب قرارات في ورقة
وامنياتي في ورقة
ونحطهن فوق الدولاب - المهنا - ههه وننساهن كانت نضفته ندير روحي ما نشوفش فيهن
اهو تسالي والواحد يشوف قديش عنده ارادة ورغبة في تحسين وتطوير نفسه
شكرا وربي يقدرك علي قراراتك وينولك امنياتك

[للاهم]

سموحة ربي ينولك وليد فارس وبنوتة جويرة
يارب بجاه اسمك العظيم