[تطبيق] المــيــدافــيــكـ من مطبخ سحابه للاخت سوار

**سحابه صيف** · 12-31-2010, 08:59 PM

حبوباتي انا من مدة شفت لاحد المنتديات هدي الكيكة لاخت سوار وعجبتني وحبيت انطبقها وقلا لازم انوريلكم التطلبق وان شاء الله يعجبكم
60 جرام زبدة حيوانية , كوب سكر , ملعقتين عسل , تلاتة بيضات , ملعقتين ضغار بيكنغ باودر , تلات أكواب دقيق

في حمام مائي نحطوا الزبدة والسكر مع بعض على نار هاااااااادية ونحركوا , بعدين نضيفوا البيض , ونقعدوا نحركوا لين يدوب السكر والزبدة ,

نضيفوا العسل , نحركوا شوية , بعدين نضيفوا البيكنغ باودر حتزيد الكمية للضعف

واحني قاعدين توا مدايرين الحمام المائي , نضيفوا كوبين دقيق ,, نحركوا نحركوا لين تتكون عجينة زي العصيدة ,, نحركوا وبعدين نقيموها من فوق النار ونضيفوا الكوب التالت للدقيقة ,, نعجنوها كويس ,,

ونقسموا العجينة لتمانية قطع
ناخدوا قاعدة طاجين التشيز كيك وندهنوها بالزبدة , بعدين ناخدوا بالقطعة نطرحوها عالقاعدة ,,
ونحدفوها للكوشة حوالي خمسة دقايق

لين حواشي العجينة يتدهبوا

, ونكرروا العملية بالنسسبة للقطع التمانية كلها ,, وهكي يكون طلع معانا هالطبقات اهما

نجوا للكريمة ,, مقاديرها :

كوب سكر , بيضة , ملعقة دقيق ,كوب ونص حليب , 250 جرام زبدة

ناخدوا السكر والدقيق و الدحية , والحليب نحركوهم عالنار , لين تولي خاترة , نقيموها من على النار ,ونيضفوا الزبدة ونقعدوا نحركوا نحركوا كووويس

أني ضفت للكريمة لوز مهروش ,, كل واحد براحته اللي يساعدك واللي عيلتك يحبوه
توا ناخدوا طبقة من الطبقات اللي درناهم , ونحطوها في صونية كبيرة , ونحطوا فوق الطبقة هادي كريمة ,, نوزعوها كويس , بعدين نحطوا طبقة تانية فوق الكريمة ,, ونصبوا عليها كريمة ونوزعوها ,, وهكدا ,,
طبقة عجينة طبقة كريمة طبقة عجينة طبقة كريمة ,, لييين توصلوا في آخر طبقة وصبوا الكريمة كلللها ,, زينوها باللوز من فوق ,, واحدفوها للتلاجة ساعتين وكولوها وهي باااااااااااررردة بنة مش عادية

ملاحطة
الزبدة لازم اتكون من نوعيه الجيدة

**الساجدة لله** · 12-31-2010, 09:02 PM

يسلمو ايديك حبيبتي والتطبيق رائع جدا جدا وحبيبتي تستاهلي احلى تقييم

**ناني2007** · 12-31-2010, 09:29 PM

يسلمو ايديك سحوبة ...تطبيق في منتهى الروعة

**طمطم** · 12-31-2010, 10:26 PM

تبان صعبة شوي وتبي شغل...... لكن تستاهل التجريب
ممكن تقوليلي شن نوع الزبدة اللي تستعملي فيها؟
بارك الله فيك

**سحابه صيف** · 12-31-2010, 10:48 PM

اقتباسالمشاركة الأصلية كتبت بواسطة الساجدة للهيسلمو ايديك حبيبتي والتطبيق رائع جدا جدا وحبيبتي تستاهلي احلى تقييم

بارك الله فيك ساجدة علي التقييم وكلامك الطيب

**سحابه صيف** · 12-31-2010, 10:48 PM

اقتباسالمشاركة الأصلية كتبت بواسطة ناني2007يسلمو ايديك سحوبة ...تطبيق في منتهى الروعة

الله ايبارك فيك يا رب اسعدني وجودك

**سحابه صيف** · 12-31-2010, 10:50 PM

اقتباسالمشاركة الأصلية كتبت بواسطة طمطمتبان صعبة شوي وتبي شغل...... لكن تستاهل التجريب
ممكن تقوليلي شن نوع الزبدة اللي تستعملي فيها؟
بارك الله فيك

لالالالا لاصعبة ولاشي غير خطواتها وسور هلبة حسيتها صعبة
الزبدة الي استخدمتها زبدة فلورة بس مننصحكش اديريها بيها لانها طعمتها قوية فلورة درتها وندمت
ومشكورة علي الرد اسعدني تواجدك