(أفكار) لتعصيد البازين والعصيدة

[ليبية]

أفكار لتعصيد البازين والعصيدة

السلام عليكم ورحمة الله وبركاته:

حبيباتي :

كلنا نحبوا البازين والعصيدة لعدة مميزات واهمها انه ساهل التحضير ولكن انا عن نفسي نبخل عليه لأني نكره التعصيد
ولقيت فكرة فيما سبق على النت وبارك الله في صاحبتها والله نسيت اسمها ونسيت الموقع اصلا
ومن هذيك الفكرة بديت كل ماخطري في البازين نديره ولانكيد فيه ولا نتعب

فكرتين
:

الفكرة الأولى :
ماكينةالعجن

وانا جربتها وكانت مية المية

والتانية ماكينة فرد العجين اللي نستعملوا فيها للورق البورك والبكلاوة وغيرها

والأثنين نتيجتهم رائعة

استعملومها وقولولي شن رايكم

على فكرة صورة البازين مش اني مدايرتها
هي صورة من ايدين الحبوبة زينب محمد

يارب تكون الفكرة عجبتكم جربوها وادعولي

[التا ئبه لله]

السلام عليكم

مشكوره لكن عرفتها من زمان

لان خوى عايش فى بريطانيا قال الليبين كلهم ايديرو فيها اسهل طريقة وصاحبتى عايشه فى امريكا

الفكره طلعت وليدة اللحطه قالت سبحان الله الحاجه ام الاختراع

[طمطم]

ايه والله تبي التجريب
وبارك الله فيك عالافكار الحلوة وعلى مشاركتنا فيها...

[الجبليه]

تسلمى على الفكرة بس الاولى فهمتها والثانيه كيف بينفرد فيها ياريت توضحيلي اكثر رغم عمري ما درته لكنى نحو تفكر فى ديرانه ههههههههه

[فضااوي]

وان نفسك يالجبلية الاولى عرفتهاابس الثانية كيف لاني من درت العملية على ظهري وانا مانفدرش

انعصد والشنبير والصغار يموتو فيهاا قلت يابنت هذي اسمها عجانة اكيد نقدر اندير فيهاا

البازين والعصيدة يعني من بناات افكار بس مكنتش نعرف انهااا منتشره ههههههههههه

بس الة البوريك كيف ايعصدو بيهااا


ويسلمووووووووو على الموضوع المميز

[سحابه صيف]

مفهمتش اولي يمكن لكن التانية لا
وها انحط الطنجرة علي النار وبعدين انقيمها هلي العجانه ولا كيييييييف يا ريت توضيح اكتر
ومشكورة علي مواضيعك الرئعه

[أمـ ساره]

السلام عليكم

ماشاء الله افكار حلوة والله وتساعد كل وحدة اهلها يحبوا البازين والعصيدة

بس وخيتي ليبية ياريت توضحيلنا الطريقة كيف ؟

سلمت ايدياتك حبيب

[أمــل]

مع أني زيكم نبي توضيح ولكن فينا طبع الاستعجال أحني الليبيات ههههه
يعني ناوية نرد توا ونرجع للموضوع ثاني
عموماً فيه طريقة القيتها سهلة لو كان _ الشمبير _ يبي البازين _ والله حلوة تسمية الشمبير _ يستاهل تاج راسنا
الفكرة هي جهزي المرقة وكل شي
وحطي البازين عالنار
ووقت تعصيده نادي اللي يبي ياكل وقوليله يعصد وانتي امسكي الطنجرة!!
ههههههههه والله بجديات ، وشن فيها كان ساعد شوية
الحياة تعاون مش كول وبس!
شن رأيكم في فكرتي ؟ مع انها أكيد مش حاتعجب اوخيتنا المراقبة الليبيه!
فمنها السماح ، وعلى فكرة حماتي في بريطانيا تستعمل فيها ماكينة العجن!
ومشكورة عالموضوع يالليبية ، وبارك الله فيك

[خدوج]

مشكورة ليبية
حتى انى عرفت طريقة العجانة للتعصيد من احد المنتديات
بس ماكينة الرشدة(الباستا)
هذه تبى شرح ؟؟؟؟؟؟؟؟؟؟؟؟

[ليبية]

هلا بيكم يا حبيبات
خلي نجاوبكم على تساؤلكم
اني بالنسبة للعجانة جربتها يعني عادي حطي العجينة وشغلي العجانة في الأول بشوي بشوية لين العجينة تخش في بعضها وبعدين زيدي السرعة
ما بالنسبة لماكينة فرد العجين والله ما استعملتها ولكن سمعت نساوين يتكلموا عليها وحتى هي عادي تاخدي العجينة وتدخليها واعرض مقاس وتفردي وبعدين اللي اقل منه وهكذا حتى تنفرد معاك العجينة وبعدين يا غاليات يبدا تشكيله ساهل
بس اني نحس انه ماكينة العجن اسهل واريح
والحمدلله انه الموضوع عجبكم