مكتئبة ومحتاجتكم

[ليبية]

يابنات محتارة وزعلانة وراسي صدااااااااااااااااااااااااااااااااااااع لين خلاص
نحس في روحي ظلمت انسانة والله من غير قصد
نحيلكم القصة وقولوا شن رايكم؟

طبعا زي ماتعرفوا لافترة اللي فاتت كنت ندور في حضانة لصغويرتي وبعد جهد جهيد لقيت حضانة مش عادية عجبتني ورائعة بصراحة المهم خليت فيها الصغيويرة واني مطمنة الحاجة الوحيدة انه صغاري يقعدوا في الأخير بروحهم مع ابلتهم ومافيش صغار تانين معاهم لأني نروح متأخرة من العمل
المهم امس لما جيت بنروح بيهم تفاجأت انه مع تدريستي للسيارة لقيت الأبلة اللي شادة الصغار وهي (أنسة) فاتحة الباب لشاب وتهدرز معاه ونسمع فيها تقوله :مازال مازال خش.
طبعا اني نصدمت وهي لما شبحتني نصدمت وهو كان بيخش وخر
فأني خشيت ولقيت صوت التلفزيون عالي وقلتلها وين الصغار قالتلي راقدين
خشيت لقيتها مسكرة عليهم الدار بالمفتاح وهما فعلا راقدين
طبعا قعدت نقول افرض ناضوا كيف تبي تسمعهم وصوت التلفزيون عالي
المهم خذيت الصغار ولبستهم جاكاتهم وجتني هي وقالتلي : جيتي بكري اليوم؟
قلتلها : ايه صارت ظروف خلتني نجي بكري شوية
قالتلي : ايه حتى خوي هذا جي يبي يروح بيا وقلتله مازال
واني طالعة لقيت الشاب نفسه مقعمز في الريسبشن وقعدت مدققة فيه
مايشبهلهاش نهائي ومع ذلك احسنت الظن وقلت يلا خوها ومع ذلك معجبتنيش فكرة انه راجل يخش للحضانة
مهما كان توا بدينا نسمعوا في حاجات غريبة والوحدة منا المفروض تخاف على صغيرها حتى من سلفيها وحتى من خوتها والله المستعان

المهم طلعت وربي العالم بحالي
الحق ياربي هي كويسة معاهم لكن الموقف معجبنيش فلما جي زوجي حكيتله اللي صار
قالي: هذي الحضانة تنسيها وتكلمي المديرة لسببين الأول باش تاخذ فلوسك والثاني باش توقضيها
قالي زي مانت خايفة على صغارك خافي على صغار الناس
المهم اتصلت بيها وحكيتلها اللي صار تفاجأت انها قالتلي: هذا اخر يوم لفلانة عندي قلتلها يا مدام راهو خوها قالتلي ممنوع حتى بوها ماتستقبلاش
تعرفوا والله العظيم من هذيك اللحظة واني حاسة بتأنيب الضمير والله ماكنت نحسابها بتقطعلها رزقها توقعت انها بتنبهها


ومن هذيك اللحظة واني مكتئبة يابنات هل اني غالطة ولا لا ؟

ولو كنتوا مكاني كيف تصرفتوا؟

[مشاغبة المطبخ]

اولا حبيبتى انتى بصراحه
الموقف صعب شويه وصدمتك قويه بصراحه
هادو صغارك وعندك الحق تخافى
لاكن فيه حاجه وحده تمنيتك درتيها هى انك
تاكتى باى وسيله من الشخص هل خوها او لا
مش على خاطرها لا لا بالعكس هى مداما القانون
يمنع استقبال حتا خوها يعنى عندك الحق تبلغى على المخالفه
الى ارتكبتها لاكن بصراحه على خاطر نفسيتك وتعديب الضمير
وباش ماتكتابيش
وبصراحه كان كنت مكانك حنتصرف زيك ونبلغ
لان بصراحه السكوت هو الى يسبب فى الاهمال
وبعدين تسكر عليهم الباب بالمفتاح علاش شنى بيهربو هما
لالا سامحينى هدا غلط ولازم تاخد عقابها
وسلامى ليك حبيبتى

[ليبية]

حبيبتي مشاغبة المطبخ
شن بنقولك والله:
اني لما كلمت المديرة مرة تانية لأني بجديات حاسة بخنقة في صدري قلتلها اني هي البنية قالت خوها لكن المدام قالتلي اني مش في منو استقبلت خوها ولا بوها اني رافضة فكرة استقبالها لراجل اصلا
قلتلها اني انه خشتنا اني والشاب كانت في نفس اللحظة
قالتلي : هو ممنوع يخش الداخل اي راجل المفروض
حتى اولياء الأمور الرجال يخذوا في صغارهم برا مايخشوش بكل
وعلى العموم صحيتي يا وخيتي وبارك الله فيك تعرفي لعند قبل ماتردي واني كنت انحس اني غالطة لكن لما رديتي عليا حسيت بطمئنة شوية
تعرفي كل مانشوف صغاري نتفكر الأبلة متعهم توجعني اني قطعتلها رزقها عن طريق الخطأ والله المستعان

[روح مغتربه]

ليبيه ........السلام عليكم اختي والله مش عارفه شن بنقولك .............
كيف حسستي نفسك للحظه انك غالطه اختي نحن في هذه الدنيا واجبنا حماية ورعاية ابنائنا والحاجات الي زي هذي ما فيهاش لعب ولا مجاملات يعني قافله عليهم الدار بروحها مصيبه وزياده امدخله خوها للحضانه والله تستاهل الي جاها

[ليبية]

اختي الكريمة روح مغتربة:
الشعور جاني لأنه البنية كانت كويسة معاهم وماغلطت وماقصرتش معاهم
والتأنيب جاني اني قلت علاش ماكلمتش المديرة على الفلوس وخلاص علاش نقطع في رزق المخلوقة؟
ونرجع ونقول زي ماقال زوجي وصغار الناس؟
المشكلة البنية اتصلت بيا تبكي: وقالتلي والله خوي (مش مهم اني مصدقتها ولا لا) لكن وجعتني تصدقوا ياجماعة مش جايني نوم من الموضوع هذا
ونحس في روحي بنبطل عمل ونقعمز لصغاري وخلاص

[فضااوي]

السلام عليكم ورحمة الله وبركاتة

ليبية

اولا واخرا انتي مش غلطانة هذول صغارك وصغار الناس والمفروض
انها عارفة القوانين
يعني عارفة انة اي رجل مهما كان المفروض ما يدخلش للحضانة
وعلى قولك الدنيا مفيهاش امان

هي غلطت وخذت جزاهااا لا تزعلي روحك ولا شي

المفروض الامانة امانة
وكيف تسكر على الصغار هذي بروحهاا غلطة كبيرة
كلكم راعي وكل راعي مسئول عن رعيتة

[نعومي نت]

السلام عليكم
صدقيني ليبية اللي درتيه عين العقل بالله عليك وينه الخو توا إللي يجي ويقعد يستنى في اخته وهم ديما بصلتهم محروقة وانتي اللي تقعدي تراجي فيهم بالربع ساعة والنص الساعة ولنفترض حسن النيه وطلع خوها اعلاش هي ما تتعرفش قوانين الحضانة و إنه يمنع منعاً بات دخول الرجال للحضانة صدقيني لا يأنبك ضميرك لا سو المي والملح اللي بتاكله في الحضانة كمل وإن شاء الله ربي يرزقها في مكان احسن من الحضانة و عسى ان تكرهوا شيئاً و هو خير لكم وخلي تستفيد من أخطائها والله هادوما الاطفال الا امانة والامانة واااااااااااااعرة 0000وعلى نفسها جنت براقش

[ليبية]

فضفض ياحبيبتي كلامك صحيح
اني احساسي بالذنب متعبني لأنه خشتي وخشت الشاب كانت في نفس اللحظة يعني ممكن اني استعجلت الأمور ولو تأنيت وكلمتها هي كان احسن من اني نكلم المديرة هذا اللي متعبني والله وخصوصا انها كلمتني بعدها تبكي قطعتلي قلبي
زوجي قعد مستغرب فيا يقولي: انت تتأسفيلها؟ هي غالطة وانت تتأسفي؟
يسمع فيا نقوللها: سامحيني ماكانش قصدي نقطع رزقك

ااااااااااااااااااااااااااه ياناس مش جايني نوم وتعبانة ومضايقة و
لكن تبوا الحق بردتوا عليا شوية
اني خايفة غدوة نمشي باش ناخذ الفلوس نلقى البنية منحبهاش هالمواقف هذي ادعولي نمشي ومانلقاهاش ويمشي الموضوع على خير

[سحابه صيف]

حيبتي والله واجعتيني ومعرفتش شني انقول لكن انت مش غلانه وبدات لو النت تعلم انه ممنوع دخول الرجال
صدقيني لو تعلم متعبيش روحك ولا اتخممي لانها تستاهل هدي حضانهوالدنيا مفيهاش امان والدنيا بدتت اتخوف والله معاد ينعطي التقه في واحد حتي في البنت نفسها واستغر الله هي الناس مش زي بعضها لكن اهو من هم الي انشوفو فيه
وصدقيني لو اتحصلي مراة اتكون تقه وتخليلها صغارك قداك وحدة من جاراك ولا هكي اتكون مطمونه احسلك فكك من حضانات والمرض الي كاتر
وربي ايعاونك

[التا ئبه لله]

السلام عليكم
سا محينى اختى ليبيه هو عندك الحق لكن لو تريتى شويه افضل خير من تئانيب الضمير

يعنى فيها قطع ارزاق والله اعلم مرات يكون خوها بالحق لكن انى شخصيا تاترة من القصه وفى النهايه
اخواتى اعلاش القسوه ان بعض الطن اتم الله اعلم ممكن كنتى تتصرفى افضل من هكى هدا راى وسامحينى