[ساندوتشات الدجاج بخبز الكسكاس ] من مطبخ ام عبسي

[ام عبسي]

السلام عليكم


http://www.libyan-kitchen.com/gallery/images/shkmajalld.gif



كل عام وانتم بألف خير

جيتكن بعد طول غياب وبصراحة تحشمت بعد هالتأخير انخش وايدي فاضية

جبتلكن طريقة الميني ساندوتش هكي اسمها الاصلي وهالطريقة خديتها من

اخت ليبية من احد المنتديات الله يعطيها كل خير وبصراحة طريقة مش عادية

بس اني غيرت شوي في طريقة الحشوة نبدوا بسم الله

العجينة

كوب صغير زبادي او لبن
ربع كوب كبير حليب دافئ
نصف ملعقة كبيرة سكر
ملعقة كبيرة خميرة فورية
ملعقة صغيرة ملح
ودقيق مايعجن هذه المقادير حتى تططيك عجينة متماسكة ونتركه تتخمر







http://www.libyan-kitchen.com/gallery/images/2012111435.jpg


ثم نقو بأعداد الحشوة وهي عبارة عن صدور الدجاج نقوم يتقطيعها

بشكل طولي ونضع عليها قليل الزيت و الملح وفلفل اكحل وقليل

من اللبن وبودرة الثوم والزنجبيل المطحون ونضعها على النار


http://www.libyan-kitchen.com/gallery/images/201211fpf.jpg


وبين ما طاب الدجاج وتتغير لونا نقطع البصل

والفلفل الحلو والطماطم بشكل طولي يعني جوانح


http://www.libyan-kitchen.com/gallery/images/201211ckc.jpg


وهذا شكل الدجاج بعدما طاب


http://www.libyan-kitchen.com/gallery/images/201211igi.jpg


وبعدها نحط عليه البصل والفلفل والطماطم

http://www.libyan-kitchen.com/gallery/images/201211vmv.jpg


ولما تدبل الخضرة اللي حطيناها عالدجاج اني نحط في الاخير ملعقة كبيرةهريسة

وربع ملعقةطماطم معجون ونصف ملعقة سكر واي نوع جبنة اذوب عندي

وبالكمية اللي نبيها طبعا الصورة هنا استخدمت جبنة موزاريلا و

جبنة الشمع الاحمر (وهذا سرطعمة خبيزتي)ويمكن استبدال ماسبق نقصد

من م الهريسة واللي بعده بكاتشب ومايونيز ونطفي عليه النار


http://www.libyan-kitchen.com/gallery/images/201211cjc.jpg


وبعدها انحط طويسة صغيرة في نص الحشوة

ونحطو فيها جمرة ونقيطات زيت وعلي طول نغطيها

بالسلفرعلشان تاخد طعم الدخان اللي طالع من الزيت والجمرة (طعم الشواء)


http://www.libyan-kitchen.com/gallery/images/201211mom.jpg


وبعد ما هنينا عالحشوة انجوا للعجينة اللي اختمرت

ونقرصها الى عدد زوجي يعني قعر وغطاء ونغطيهم بقطعة قماش


http://www.libyan-kitchen.com/gallery/images/201211qfq.jpg


ونمشي على طول انحط الكسكاس بالمقلوب

علي اكبر عين في الغاز وما نعلي الغاز واجد


http://www.libyan-kitchen.com/gallery/images/201211beb.jpg


وتوا انجوا للشغل المزبوط ناخدوا قرصين من العجينة

ونفردهم بالنشابة او العصى امتاعت فرد العجينة ع الرخامة

او لوحة فرد العجينة مع شوية دقيق ونحط في وحدة منهم فقط ملعقة كبيرةمملوئة من الحشوة


http://www.libyan-kitchen.com/gallery/images/2012111436.jpg


وبعدين انحط القرص الفاضي فوق القرص اللي حطينا فيه الحشوة


http://www.libyan-kitchen.com/gallery/images/201211ryr.jpg


ونضغط باصابعنا على اطراف العجينة كويس علشان ما تطلع الحشوة اثناء الخبز


http://www.libyan-kitchen.com/gallery/images/201211tit.jpg



ونسوي الاطراف بقطاعة البيتزا ونحولو الزايد من العجينة

http://www.libyan-kitchen.com/gallery/images/201211qmq.jpg


وعلى طول ع الكسكاس الساخن


http://www.libyan-kitchen.com/gallery/images/201211rrr.jpg


ونقلبها بعد ما نعطوها الوقت الكافي للطياب اني هنا عطيتها اكثر من الازم;)

http://www.libyan-kitchen.com/gallery/images/201211nnn.jpg


اااااااااااااااهه ياظهري واخيرا كملتها هي تفضلن ياحلوت تستنن في الواحد لين يعزمكن عزومة

حقة انسيت قبل ماتكلن دهننها بشوية زيت علشان تحول شهوبية الدقيق

http://www.libyan-kitchen.com/gallery/images/201211owo.jpg


وهذاشكلها من داخل والطعم ممممممممممممم ماينوصف يبي ايدين ايديرن وايذوقن

http://www.libyan-kitchen.com/gallery/images/201211fdf.jpg


وصحتين علي قلوبكن

[ام عبسي]

معليش يابنات ما حد يرد عا لموضوع نزل مني بالغلط
ودروحني بنعدلة لخبط الدنيا والنت بطئ
توا انعدل فيه سامحني

[بنت حواء]

http://www.libyan-kitchen.com/gallery/images/201211owo.jpg


أولا نقلتلك الموضوع للركن المناسب
ثانيا ماشااااااااااااء الله على السندويتشات يااااااااخذو العقل
خطرتي عليا سندويتشات الفاهيتا تشبها غير في المطاعم يديرو فيها في الفرن الحجري
سلم يدياتك وشكرا على عزومتك أنا أول وحدة لحقت :D
ولك 5 نجوووووووووووم

[sweet nona]

http://www.libyan-kitchen.com/gallery/images/201211nnn.jpg

مممممممممممم

انى بناخدها طووول سخونة من الكسكاس مادام بنت حواء بدت فيهم

مش حتعطى قبل كاتجى المصراتية ولا لوبا يهجمو عاد عارفتيهم

انتى مايخلو حصة لحد هههههههههههه

غابت وجابت ماشالله سندوتشات اتشهى ياام عبسى وطريقة واضحة

وشرحك ممتاز

تسلم ايديك وهلا برجعتك من جديد نورتى

احلى تقييم بعد ان تم الحفظ

[مغتربة 7]

http://www.libyan-kitchen.com/gallery/images/201211fdf.jpg

حتى اني بناخد حصتي

ماشاء الله لاقوة الابالله
ساندوتشات تااااااااااااااااااخد العقل وفكرتها مش عادية
تسلم الايادي الى تلتف بالحرير
تستاهلي احلى تقييييييم
استاحشناك ياام عبسي

[luba]

http://www.libyan-kitchen.com/gallery/images/201211rrr.jpg



وعليك السلام وانت بالف خير
ناخد حتي هادي انراجي ام عبسي وهي اطيب فيها
البنات ماخلوا شي
ليك وحشة و منورة علي الاصرار والعزيمه في فهم تنزيل المواضيع
نحييك

والموضوع رائع وشرح ماشاء الله كافي ووافي
وتصوير ممتاز
اهلين بالحامل والمحمول نجي الدوق كله جانا وايده معبيه
ربي يعطيك الصحة وكل ماتتمني تم التقييم ليك
وللموضوع

[المصراتيه]

http://www.libyan-kitchen.com/gallery/images/2012111436.jpg

ياستار استر بالك واجد عليك بنيت حواء واخده التبسي كله
اني خديت الطريف هدا وتو نعاونك في تطيبته مدام البنات اللي اطيب يلمنها
ماشاءالله لا قوه الا بالله
طريقه تهبـــــــــــل واكيد حنجربها بادن الله
يعطيك الصحه وتسلم يدياتك وان شاءالله ديما منوره المنتدي
وقاعدين انراجو في احلي طبخات منك
تسلمي وجاري التقيـــــــــم

[أمـ ساره]

http://www.libyan-kitchen.com/gallery/images/201211owo.jpg

ماشاء الله لاقوة الا بالله

رعايش يا أم عبسي رعاااااايش

بنوتة والله ما دخلني فيك بناخذ حتى نص طريف ولا يقعد في خاطري


ماشاء الله لا قوة الا بالله أم عبسي

خبيزة اتهبل وتجي في الخاطر ولا الي في المطاعم

جيتي محملة ماشاء الله وهذا من حظنا

ربي يسلم ايدياتك ويبارك فيك وفي وقتك وجهدك يارب

تستاهلي أحلى تقييييييم أكيد

[حبيبتهم]

ماشاء الله يا ام عبسي
تسلم ايديك على احلى سندوتشات من احلى ايدين
شكلهن روعة واكيد الطعمة بتكون نفس الشكل
وجاري التقييم

[نسمه ليبيه]

يسلموا ايديك سندوتشات انعنهن صباح كل جعان يهلبن

[ام عبسي]

الله يسلمكن وينجيكن وينور ايامكن علي الردود الحلو
ولا يهمكن كل وحدة انديرلها صحن امعبي تستاهلن
وان شاء تستاحشكن الصحة والعافية علي طول عمركن

[الصابرة]

يامرحبا بالحامل والمحمول
مع اني جيت متأخرة
لكن ماشاءالله سندوتشات روعة واكيد جاري التطبيق
واحلى تقييم ونجوم لعيونك
وربي يدوم عليك عافيتك وصحيحتك يارب

[زوبة الطيوبة الحبوبة]

روعة هالفكرة يسلموا أختي أم عبسي
تهبل وأن شاء الله حنجربها ...

[أم ملك]

ماشاء الله ولاقوة الا بالله تسلم يدياتك ياغالية ربي يحفظك وينولك اللي في بالك

[ام عبسي]

بارك الله فيكن حبيباتي ويخليكن
وشكرا ع التثبيت

[نسيبة]

تسلم الايادي غالية رائعةةةةةةةةةةةة

[نجوي]

ماشاء الله ساندوتشات روعة يسلموا

[لوتي]

ماشاء الله أم عبسي تسلم إيدك عجبتني هلبا وطريقة روووعة بارك الله فيك وعلى طووول للتقييييم
بس بنسألك السكر بالملعقة الكبيرة صح

[علياء السلفية]

السلام عليكم ,,,
يسلموا حبيبتي علي الخبيزة الحلوة , نحسها زي الحواوشي المصري غير هم الحشوة نيه ويديروه في الكوشة ولا عالطاوة او الشواية الكهربائية تسلم ايدك وربي يحفظك .

[شروق الشمس]

يسلموا الديات الحلوة الحق منظرها ايسهف

[ام عبسي]

بارك الله فيكن وفي كلامكن الحلو ويسلمكن
حبيبتي لوتي مزبوط ملعقة سكر كبيرة بس ما تمليها واجد
اختي علياء اعتقد ان الحوواشي يحطو في اللحم المفروم وهو ني في خبزة جاهزة
وبعدين يسلفروه ويكون ياع الشواية او في الكوشة
وتسلمن مرة اخرة ع المرور

[تعزيز]

تسلم ايدك مليون على الخبيزة شكلها اشهي
دخلت للنفوخ وللتجربة

تحياتي صحة وعافية

[زوبة الطيوبة الحبوبة]

ماشاء الله خبيزات يجوا في الخاطر
الله يسلم أيدياتك ويسلملك عبسي أن شاء الله..

[نسمه ليبيه]

ام عبسي بنديرهن توه بس بنسالك فيها ميه والا لا

[أم عبادة الليبية]

يسلموووووووووووووووا أم عبسي .

http://www.libyan-kitchen.com/gallery/images/201211owo.jpg

[نوسه التونسى]

ر99999999999999999999999999999عة

[نسيبة]

http://img.el-wlid.com/imgcache/388220.gif