[ساندوتشات الدجاج بخبز الكسكاس ] من مطبخ ام عبسي

**ام عبسي** · 11-15-2012, 02:56 AM

السلام عليكم

كل عام وانتم بألف خير

جيتكن بعد طول غياب وبصراحة تحشمت بعد هالتأخير انخش وايدي فاضية

جبتلكن طريقة الميني ساندوتش هكي اسمها الاصلي وهالطريقة خديتها من

اخت ليبية من احد المنتديات الله يعطيها كل خير وبصراحة طريقة مش عادية

بس اني غيرت شوي في طريقة الحشوة نبدوا بسم الله

العجينة

كوب صغير زبادي او لبن
ربع كوب كبير حليب دافئ
نصف ملعقة كبيرة سكر
ملعقة كبيرة خميرة فورية
ملعقة صغيرة ملح
ودقيق مايعجن هذه المقادير حتى تططيك عجينة متماسكة ونتركه تتخمر

ثم نقو بأعداد الحشوة وهي عبارة عن صدور الدجاج نقوم يتقطيعها

بشكل طولي ونضع عليها قليل الزيت و الملح وفلفل اكحل وقليل

من اللبن وبودرة الثوم والزنجبيل المطحون ونضعها على النار

وبين ما طاب الدجاج وتتغير لونا نقطع البصل

والفلفل الحلو والطماطم بشكل طولي يعني جوانح

وهذا شكل الدجاج بعدما طاب

وبعدها نحط عليه البصل والفلفل والطماطم

ولما تدبل الخضرة اللي حطيناها عالدجاج اني نحط في الاخير ملعقة كبيرةهريسة

وربع ملعقةطماطم معجون ونصف ملعقة سكر واي نوع جبنة اذوب عندي

وبالكمية اللي نبيها طبعا الصورة هنا استخدمت جبنة موزاريلا و

جبنة الشمع الاحمر (وهذا سرطعمة خبيزتي)ويمكن استبدال ماسبق نقصد

من م الهريسة واللي بعده بكاتشب ومايونيز ونطفي عليه النار

وبعدها انحط طويسة صغيرة في نص الحشوة

ونحطو فيها جمرة ونقيطات زيت وعلي طول نغطيها

بالسلفرعلشان تاخد طعم الدخان اللي طالع من الزيت والجمرة (طعم الشواء)

وبعد ما هنينا عالحشوة انجوا للعجينة اللي اختمرت

ونقرصها الى عدد زوجي يعني قعر وغطاء ونغطيهم بقطعة قماش

ونمشي على طول انحط الكسكاس بالمقلوب

علي اكبر عين في الغاز وما نعلي الغاز واجد

وتوا انجوا للشغل المزبوط ناخدوا قرصين من العجينة

ونفردهم بالنشابة او العصى امتاعت فرد العجينة ع الرخامة

او لوحة فرد العجينة مع شوية دقيق ونحط في وحدة منهم فقط ملعقة كبيرةمملوئة من الحشوة

وبعدين انحط القرص الفاضي فوق القرص اللي حطينا فيه الحشوة

ونضغط باصابعنا على اطراف العجينة كويس علشان ما تطلع الحشوة اثناء الخبز

ونسوي الاطراف بقطاعة البيتزا ونحولو الزايد من العجينة

وعلى طول ع الكسكاس الساخن

ونقلبها بعد ما نعطوها الوقت الكافي للطياب اني هنا عطيتها اكثر من الازم

اااااااااااااااهه ياظهري واخيرا كملتها هي تفضلن ياحلوت تستنن في الواحد لين يعزمكن عزومة

حقة انسيت قبل ماتكلن دهننها بشوية زيت علشان تحول شهوبية الدقيق

وهذاشكلها من داخل والطعم ممممممممممممم ماينوصف يبي ايدين ايديرن وايذوقن

وصحتين علي قلوبكن

**ام عبسي** · 11-15-2012, 03:38 AM

معليش يابنات ما حد يرد عا لموضوع نزل مني بالغلط
ودروحني بنعدلة لخبط الدنيا والنت بطئ
توا انعدل فيه سامحني

**بنت حواء** · 11-15-2012, 09:06 AM

أولا نقلتلك الموضوع للركن المناسب
ثانيا ماشااااااااااااء الله على السندويتشات يااااااااخذو العقل
خطرتي عليا سندويتشات الفاهيتا تشبها غير في المطاعم يديرو فيها في الفرن الحجري
سلم يدياتك وشكرا على عزومتك أنا أول وحدة لحقت
ولك 5 نجوووووووووووم

**sweet nona** · 11-15-2012, 10:28 AM

مممممممممممم

انى بناخدها طووول سخونة من الكسكاس مادام بنت حواء بدت فيهم

مش حتعطى قبل كاتجى المصراتية ولا لوبا يهجمو عاد عارفتيهم

انتى مايخلو حصة لحد هههههههههههه

غابت وجابت ماشالله سندوتشات اتشهى ياام عبسى وطريقة واضحة

وشرحك ممتاز

تسلم ايديك وهلا برجعتك من جديد نورتى

احلى تقييم بعد ان تم الحفظ

**مغتربة 7** · 11-15-2012, 03:34 PM

حتى اني بناخد حصتي

ماشاء الله لاقوة الابالله
ساندوتشات تااااااااااااااااااخد العقل وفكرتها مش عادية
تسلم الايادي الى تلتف بالحرير
تستاهلي احلى تقييييييم
استاحشناك ياام عبسي

**luba** · 11-15-2012, 04:18 PM

وعليك السلام وانت بالف خير
ناخد حتي هادي انراجي ام عبسي وهي اطيب فيها
البنات ماخلوا شي
ليك وحشة و منورة علي الاصرار والعزيمه في فهم تنزيل المواضيع
نحييك

والموضوع رائع وشرح ماشاء الله كافي ووافي
وتصوير ممتاز
اهلين بالحامل والمحمول نجي الدوق كله جانا وايده معبيه
ربي يعطيك الصحة وكل ماتتمني تم التقييم ليك
وللموضوع

**المصراتيه** · 11-15-2012, 09:02 PM

ياستار استر بالك واجد عليك بنيت حواء واخده التبسي كله
اني خديت الطريف هدا وتو نعاونك في تطيبته مدام البنات اللي اطيب يلمنها
ماشاءالله لا قوه الا بالله
طريقه تهبـــــــــــل واكيد حنجربها بادن الله
يعطيك الصحه وتسلم يدياتك وان شاءالله ديما منوره المنتدي
وقاعدين انراجو في احلي طبخات منك
تسلمي وجاري التقيـــــــــم

**أمـ ساره** · 11-16-2012, 07:51 PM

ماشاء الله لاقوة الا بالله

رعايش يا أم عبسي رعاااااايش

بنوتة والله ما دخلني فيك بناخذ حتى نص طريف ولا يقعد في خاطري

ماشاء الله لا قوة الا بالله أم عبسي

خبيزة اتهبل وتجي في الخاطر ولا الي في المطاعم

جيتي محملة ماشاء الله وهذا من حظنا

ربي يسلم ايدياتك ويبارك فيك وفي وقتك وجهدك يارب

تستاهلي أحلى تقييييييم أكيد